“Hussaini Alam” “Hussaini Alam Aashoorkhana”
Kaha Jaata Hain Ke Shehr e Hyderabad Deccan Ka Yehi Aashoorkhana Bohot Qadeem Hai.
Tafseel ye hain ke Deccan ke “Qutub Shahi” baadshaho’n ke zamaane me ek shaqs “Janaab Aagha Ali” naami ek martabah Hajj ( khana e kaaba ) ki ziyarat ko gaye huwe the jab wo Madeena Munawwarah pohonche to waha’n unko “Hazrat Imam Jaffer Saadiq Alaihissalaam” ke zamane ke ek qadeem alam e mubarak mila wo us alam e mubarak ko saath lekar Karbala e Mualla ki ziyarat ko gaye to waha’n ittefaaq se ussi qadeem zamane ki ek shamsheer,talwaar bhi milgayi ( Imam Jaffer Saadiq Alaihissalaam Ki Shamsheer” )…
Janaab Aagha Ali Sahab wo dono muqaddas cheezo’n ko lekar Shehr e Hyderabad Deccan wapas aaye to is baat ki baadshah ko khabar milte hi baadshah isteqbaal ke liye seher ke baahar nikla aur nihayat hi adab o tauqeer ke saath wo taburrukaat ko shehr me laaya.
Aur un alam e mubarak par ghilaaf chadha kar ek alheda mahfooz maqaam par rakhdiya jaha’n wo ab tak mahfooz hai. Is muqaddas Alam e Mubarak ki wajah se muhalle ka naam “Hussaini Alam” hogaya aur ab tak bhi issi naam se muhalla aabaad hai.
Jab se mujhe ye alam e mubarak ki haqeeqat pata hoi ziyarat ke liye dil bohot bechain hogaya tha aaqir kaar aaj mujhe yaha’n ki ziyarat naseeb hoi.
Agar aap Shehr e Hyderabad Deccan me rehne waale hain to zaroor is azeem baargah ki ziyarat kijiye.
Note: ye alam e mubarak ki ziyarat sirf maah e muharram ke chaand dikhne ke baad se 10 muharram ki shab se pehle tak hi ki jaasakti hai.
aale Mohiuddin qutbi 